Har Saal Ki Akhri Nazam Saal E Nau Mubarak, Urdu Nazam By Abrar Ahmad

پیاس ہے ،ہر طرف پیاس ہی پیاس ہے

سر پہ بادل جھکے ہیں ، برستے نہیں

راستوں پہ ازل سے رواں قافلوں کے قدم ڈولتے بھی نہیں

فاصلے بولتے بھی نہیں

وقت کی دھند میں سہمے سمٹے ہوئے

ان مکانوں کی خاموشیوں کے لیے

دل پہ اک بوجھ ہے

جن کے آنگن ، کسی نرم چاہت کی صبحوں کی خاطر کشادہ نہیں

ایستادہ نہیں

منزلوں کے لیے ، جن کی سمتوں پہ گہرا اندھیرا تنا ہے

جو چھٹتا نہیں

در بہ در سر پٹکتی ہوا کے لیے

جس کی آہٹ پہ در کوئی کھلتا نہیں

اپنے دل کے مسافر کی خاطر

کہ جس کو کوئی راہ ملتی نہیں

دوستوں کے لیے

جن کے ہونٹوں سے گرتے ہوئے لفظ

سانسوں میں الجھے ہوئے خواب کے شور میں ڈوب جاتے رہے ----

تھکن اور بے داریوں کے تسلسل میں بھٹکی ہوئی جن کی آنکھیں

یہ منظر بدلتے ہوئے

دیکھنے کے لیے خاک ہونے کو ہیں

اپنے اطراف میں

شور و غل کے غلافوں میں اتری ہوئی

خامشی کے لیے

دل پہ اک بوجھ ہے

معبدوں کی اداسی میں ٹھہرے ہوے آنسوؤں کے لیے

ان دعاؤں کی خاطر ، جو لفظوں میں اپنے لیے راستے ڈھونڈتی ہیں

لرزتے ہوئے آسماں کے لیے

اس زمیں کے لیے

جس پہ بادل جھکے ہیں

برستے نہیں

پیاس ہے ہر طرف ،پیاس ہی پیاس ہے ....