Main Ne Buhat Sa Waqt Zaya Kar Diya, Urdu Nazam By Abrar Ahmad

اس کے ھونٹوں پر پھول کھلانے

اور اسے ملنے کے لیے

وقت نکالنے میں میں ںے بہت سا وقت ضائع کر دیا

ایک گیت کو ڈھونڈنے اور گنگنانے میں

اپنے قدموں سے

ایک راستے کو جدا کر کے

کسی اور طرف نکل جانے میں...

اپنے لہو میں ایک آگ کو سرد کرنے

ایک خواب کی پکڑ سے نکلنے

اور بے اماں دنوں کے ساتھ

قدم ملا کر چلنے میں......

دل اور دنیا کے درمیان

ایک پل بنانے

اور اس پر سے گزرنے کی اذیت میں....

جوتے چمکانے اور اپنا میلا لباس تبدیل کرنے میں

دؤڑ کی ابتدائ لکیر تک آنے

چلتی گاڑی کے أخری ڈبے تک

پھنچنے کی کوشش آغاز کرنے میں..

میں ںے بھت سا وقت ضائع کر دیا

اپنی مٹی سے دور

ایک گھر کے لیے اینٹیں اکٹھی کرنے

اور دوسروں کے درمیاں

جگه بنانے میں

اسے دیکھنے

اور دیکھ کر گزر جانے میں.........

حالانکہ

اتنے وقت میں..بہت سے

باغ لگائے جا سکتے تھے

بہت سی دھوپ جمع کی جا سکتی تھی

اور

کہیں بھی پہنچا جا سکتا تھا

افسوس ......

تأسف کے دھویں سے

میرا دم گھٹنے لگا ہے

اور اس جلتے مکان سے

شاید .. تم بھی

مجھے باہر نہیں نکال سکتے !