Sab Jalta Hai, Urdu Nazam By Abrar Ahmad

ہر جانب بارش ہوتی ہے

اور خواب اترنے لگتے ہیں

ٹھنڈک لے کر

دہلیز پہ دستک دیتی ہے

چاہت سے پاگل ہوا کوئی

اور دل میں خوشبو پھیلتی ہے

اور شام اترنے لگتی ہے

پھر اندھیارے کی خاموشی میں

آگ سلگنے لگتی ہے

کیوں آگ سلگنے لگتی ہے ؟

وہ آگ جو تیرے باہر ہے

وہ آگ جو میرے اندر ہے

سب جلتا ہے

آواز کے مخزن سے

ہر گوش سماعت تک

لفظوں کی شاخوں ، نظموں کے جنگل میں

اڑتے پرندوں تک ...

کہساروں سے میدانوں تک

بازاروں سے گلیاروں تک

فردا کے رخ سے تا بہ ابد ......

قبروں سے گھر تک

کپڑوں سے دروازوں تک

ہر خواب سے

خوشبو کی چوکھٹ تک

جلتا ہے .....

کن دنوں کی راکھ ہے

کانٹے چبھے ہیں آنکھوں میں

اک آگ ہے

دل میں لگی ہوئی

اک آگ ہے ..دل میں بجھی ہوئی