Sada Ba Sehra

صدا بہ صحرا

اچانک .. نا معلوم لہروں پر بہتی ہوئی

" بیپ " کی آواز کے ساتھ

جل کر بجھ جانے والی روشنی

شور بھری خاموشی کو

مزید گہرا کر دیتی ہے

بینائی کے لیے .. ایک نیا واہمہ

الجھا ہوا ، بے ربط ، بے معنی

بے بنیاد امید سے لکھا گیا ایک خط

انسان کے انسان سے معانقے

اور مرد کے

عورت سے اختلاط کا

بے مثال متبادل

جس میں ایمان اور لباس پر

داغ لگنے کا کوئی اندیشہ نہیں ...

سکرین کے عقب میں تصویر ، کسی ان دیکھے شخص کی

جس کے خد و خال ، گھڑے جا سکتے ہیں

اپنی اپنی جمالیاتی گہرائی کے مطابق

ایسے بول .. جنھیں آپ مرضی کے ہونٹوں پر رکھ سکتے ہیں

ان آنسوؤں کی طرح

جنھیں کسی بھی کاندھے سے لگ کر

بہایا جا سکتا ہے

آسمان تک پھیلی دیوار میں .. ادھ کھلی کھڑکی

جس میں سے وہ بھی دیکھا جا سکتا ہے

جو آپ دیکھنا چاہتے ہیں !

جی چاہتا ہے .. ایک پیغام بھیجوں

اجنبی زمینوں پر چہل قدمی کرتے لوگوں کی طرف

اور بتاؤں

ان اطراف پر چھائی مردنی

اور موت کی چنگھاڑ ..

دیواروں سے ٹکراتے سر کی دکھن کے ساتھ

لکھوں ، اضطراب اور ملنے کی تڑپ

اس کے لیے

جو اٹلی کے کسی بار روم میں تنہا بیٹھی

کسی کی راہ دیکھ رہی ہے

آنسو بن کر بہ نکلوں

اس کی نیلی آنکھوں سے

جنھیں جلدی سے خشک کرتے ہوے

وہ نکل پڑے

بارش میں بھیگتی .. کہر آلود سڑکوں پر

تیز ہواؤں میں بجتی

فلیٹ کی کھڑکی کھول کر

پہچاننے کی کوشش کرے

اور اندھیرے کو مٹھیوں میں بھر کر

لوٹ جائے

اس ان دیکھے شخص کو یاد کرتے ہوے

جو سمندروں کی دوری پر

اس کے لیے موجود رہا !

ابراراحمد

© UrduPoint.com

All Rights Reserved

(519) ووٹ وصول ہوئے

Your Thoughts and Comments

Urdu Nazam Poetry of Abrar Ahmad, Sada Ba Sehra in Urdu. This famous Urdu Shayari is a Nazam, and the type of this Nazam is Love, Sad, Social, Friendship, Bewafa, Heart Broken, Hope Urdu Poetry. Also there are 93 Urdu poetry collection of the poet published on the site. The average rating for this Urdu Shayari by our users is 4.8 out of 5 stars. Read the Love, Sad, Social, Friendship, Bewafa, Heart Broken, Hope poetry online by the poet. You can also read Best Urdu Nazam and Top Urdu Ghazal of Abrar Ahmad.