Waqt Kuch Aaisa Aa Jata Hai, Urdu Nazam By Abrar Ahmad

وہ دن بھی تھے

جب رنگ گرا کرتے تھے

تمھاری باتوں سے

کوئی مجلس چلتی رہتی تھی

آوازوں کے جھرمٹ میں ، تمہاری

رس سے بھری ہوئی آواز کا افسوں تھا

جو آنکھوں میں رت جگے بچھاتا

خواب سجاتا رہتا تھا

سب چنتے تھے

وہ پھول ، تمھارے ہونٹوں سے

جو لمحہ لمحہ گرتے تھے

سب سنتے تھے

آواز کی انگلی تھام کے

اپنے رستے ڈھونڈتے رہتے تھے

پھر یوں ہوتا ہے

تیر کہیں سے چلتا ہے

اور دل میں ترازو ہوتا ہے

آواز میں گرہیں پڑتی ہیں

اور جل تھل ہونے لگتا ہے

اور کاغذ بھیگنے لگتے ہیں

تب سننے والے ہنستے ہیں

اور تمھارے لفظوں کو

قدموں سے روند کے

آگے بڑھتے جاتے ہیں

آ جاتا ہے

وقت کچھ ایسا آ جاتا ہے

اپنی لکنت سے گھبرا کر

چپ ہو جانا پڑتا ہے

پھر بولتے ہیں

وہ لوگ ، جو سب کچھ جانتے ہیں

اور اس سے پرے

راتوں کا قرینہ .. اپنی بانہیں کھولتا ہے

بھولی بسری آوازوں کی لہروں پہ کہیں

تم .. چکر کھانے لگتے ہو

کوئی چپ دہرانے لگتے ہو !