Himala, Urdu Nazam By Abrarul Hasan

عجیب بیزار شخص ہے وہ

اسے عقیدت اذیتوں آزمائشوں سے

وہ سر پہ دنیا کا بوجھ ڈالے

روایتوں کے لئے حوالے

تمام ہمت بکف دیانت

کنواں نیا روز کھودتا ہے

پھر اس میں گرتا ہے

گر کے خود کو نکالنے کی مہم میں دن رات کاٹتا ہے

اسے محبت ہے ذات کی گہری کھائیوں سے

کمال حیرت ہے اس نے خود سے کبھی نہ پوچھا

یہ بوجھ کیسا اٹھا رکھا ہے

ہے اس اذیت میں مصلحت کیا

قدم قدم خار دار رستے

یہ دشت و دریا یہ کوہساروں کے سلسلے سے

یہ چھوٹی چھوٹی رکاوٹیں ایک پھول حد تک

یہ لمحے لمحے کی مسکراہٹ کے منتظر لوگ ہسپتالوں میں

میری آنکھوں سے کیوں چھپے ہیں

یہ میرے خوابوں سے دور کیوں ہیں

سلے ہوئے ان کے ہونٹ کیوں ہیں

کمال حیرت ہے اس نے خود سے کبھی نہ پوچھا

کوئی صدا سرفروش جذبہ

کوئی ندا کیوں نہیں بلاتی

اے دام کلفت کے بے ریا دائمی ستم کش

میں منتظر ہوں

کبھی مجھے بھی تو آزما لے