Kayi Bhare Gumbad Ka Noha, Urdu Nazam By Abu Bakr Abbad

کاش نہ ہوتا تو اچھا تھا

ایسا بھی ہوتا ہے جگ میں

رب کے ہم سایے کی ایسے

رب کے پجاری جاں لیتے ہیں

دن بڑا غمگیں سا تھا وہ

سورج بھی رویا تھا پہروں

صدیوں کی وہ رات عجب تھی

جیسے روحیں چیخ رہی ہوں

صبح کی چنچل ہوا جو آئی

جانے کس کو ڈھونڈ رہی تھی

بولائی بولائی سی

پھول پرندے سب گم صم تھے

پیڑوں کے پتے تک ساکت

فصلوں کی بالیں بھی چپ تھیں

سریو کی آنکھوں کے آنسو

جانے کیوں نہ تھمتے تھے

ناری بالک پیر فقیر

گیانی اور اپدیشک بھی

سب حیراں تھے سہمے تھے سب

دبدھا میں تھا ہر کوئی

کیسے کس کو منہ دکھلائے

مرد مقدس لوہ پرش

تیر دھنش جب لے کر لوٹا

ٹوٹ چکا ہو خود وہ جیسے

شرمندہ افسردہ تھا

ظالم کو پراجے کرنے والا

عصمت سیتا کا رکھوالا

اپنا سب کچھ تیاگنے والا

راج دھرم کا رکشک خود ہی

خود اپنی نگری کے اندر

بے بس اور رنجیدہ تھا

کیوں کہ خود اس کے اپنوں نے

اس کی ہی نگری میں آ کر

اس کا ہی دل توڑ دیا تھا

آج بھی جب وہ دن آتا ہے

سورج چندا دن اور رات

پھول پرندے کھیت کی فصلیں

بالک گیانی پیر فقیر

سب گم صم ہو جاتے ہیں

سورج سریو سیتا مل کر

پہروں نیر بہاتے ہیں

کہ راج دھرم کے رکشک کا دل

پھر سے توڑا جاتا ہے