KHana-ba-dosh, Urdu Nazam By Afsar Seemabi Ahmad Nagari

shaKHon pe surKH-o-zard shagufe hain mahw-e-KHwab
KHwab-e-giran se jagne wala hai aaftab
gesu khule hue hain urus-e-bahaar ke
shane hila rahi hai saba lala-zar ke
viran ho chali hai sitaron ki anjuman
daman-e-kohsar mein jaise hain KHema-zan
wo log paikar-e-gham-o-hirman kahen jinhen
betabiyon ke rup mein insan kahen jinhen
har sans ek mahshar-e-pinhan liye hue
bedariyan bhi KHwab-e-pareshan liye hue
ambar-e-arzu se tanaffus ruka hua
ifraat-e-gham se ruh ka parcham jhuka hua
nauras kanwal sumum-e-ajal ki panah mein
be-jaan hasraton ke talatum nigah mein
sinon mein dil kashakash-e-hasti se dagh dagh
insaniyat ki qabr ke bujhte hue charagh
honTon pe aah-e-sard jabin par ghubar-e-rah
hain is zamin pe KHak-basar kitne mehr-o-mah