Khalq E Khuda Ka Haq Ju Kahin Or Jaye Ga, Urdu Ghazal By Afzaal Naveed

خلقِ خُدا کا حق جو کہیں اَور جائے گا

چیخوں کا آسمان تلک شور جائے گا

مٹّی کی سنسنی سے ہُوا خالی سارا شہر

سر بھرنے آج پھر وہ سرِ گَور جائے گا

ڈسنے لگے گا فالتو زر ایک دن اُسے

اِتنا ذخیرہ کر کے کہاں چور جائے گا

آ جائے گی قلم کی حرارت وجود میں

کر کے لہو لہو جو جنوں پَور جائے گا

مَیں دیکھتا رہوں گا بہت دُور تک اُسے

وہ آس پاس کرتا ہُوا غور جائے گا

بادل کو اِس کرشمے کا معلوم ہی نہیں

آنکھوں سے جب گزر گیا گھنگھور جائے گا

آزاد ہو نہیں سکے گا چھوڑ کر ہمیں

وہ اپنے ساتھ لے کے کوئی ڈور جائے گا

تیّاری ہو رہی ہے ابھی رنگ بھرنے کی

جنگل ہرا ہُوا تو مرا مور جائے گا

جتنا بھی لگ سکے سو لگا لوں کہ ساتھ ہی

جتنا بھی لگ سکے گا یہاں زور جائے گا

زرخیز ہونے سے بھی بڑھے گی بساط کیا

لبریز ہونے پر بھی کہاں دَور جائے گا

روکا ہُوا ہے تیرے لیے اسپِ عُمر کو

تُو آ گیا نظر تو یہ فی الفور جائے گا

کیا کیا نہ بارشیں تھیں مٹانے کے واسطے

معلوم تھا کہ صفحہٗ دل کَور جائے گا

آیا پہاڑ بھی تو نہیں رک سکا نوید

آیا پہاڑ بھی تو بہرطور جائے گا