Darasal Yeh Nazam Likhi Hi Nahi Gayi, Urdu Nazam By Ahmad Hamesh

بعض باتیں بہت معمولی ہوتی ہیں

مگر ان کے دانت پورے جیون کو کاٹتے رہتے ہیں

یہ ایک نظم کے درمیان ہوا آغاز تھا جو اختتام تک پہنچنے سے پہلے ہی پوری نظم سمیت گم ہو گیا

شاید بعض بہت معمولی باتوں کے دانت ایک پوری نظم کے جیون کو مسلسل کاٹتے رہنے کے لیے ہوں گے

سو تمہاری نظم گم ہو گئی ہمیشؔ

سو تم بھی گم ہو جاؤ ہمیشؔ

ان دیکھی تہہ داریوں میں گم ہو جاؤ ہمیشؔ

اس سے پہلے کہ کسی آواز کے دانت عدم تاریک میں کوند جائیں

کیوں نہ تم ابھی یہ جان لو کہ

معمولی سے معمولی بات اپنے حصہ کی آواز سے گزر گئے نہ جاننے والے کے لئے تو بازگشت بن جاتی ہے

مگر جاننے والے کے لئے موت کے دانت

ورنہ یہ اسی کا تو سوندریہ جہاں گزیدہ ہے کہ

دھوپ اتنی دھواں دھار گر رہی ہے کہ بجلی کے کھمبے اور چلے گئے ہیں

اب کبھی کچھ نہیں سنائی دے سکے گا

پہلے بھی کیا سنائی دیا ہوگا

کہ ایک ابھاگی سماعت کو ایک گھنٹے کی نشہ گمان ضرب نادیدہ

یا تین منٹ کی سکوت خوش گوار ٹھوکر پر رکھ لیا ہوگا

اور کہا گیا کہ اب انتظار نہ کرنا کہ اب بہت ہو چکا کہ نہیں چاہئے کہ جو کبھی چاہئے تھا

سو جس راہ پر آج تم اداس مقسوم بیٹھے ہو

اس سے تمہارے حصہ کی کوئی من چاہی راہ تو کے نہیں ملتی

وہ کوئی اور زمانہ رہا ہوگا

ورنہ کہاں کی چمبل ندی اور کہاں اس کا پانی

اور کبھی کنارے سے ڈالا ہوا پرانا تانبے کا پیسہ اس کی تہہ میں پڑا نظر آ رہا تھا

تو وہاں اب تک کتنی ہی حاسد سوتیلی پرچھائیوں کا نزول ہوا ہوگا

تمہارے آنسوؤں کے سنکن کو ان دیکھی مٹی میں دبا کے اوپر سے پاٹ دینے کے لئے

سو گم ہو جاؤ ہمیشؔ

اس کی نظر سے اور اپنی نظر سے بھی

ایسا تو کبھی نہیں ہوا ہوگا

کہ اگر کسی نے خدا کو نہیں دیکھا

تو کیا خدا نے بھی کسی کو نہیں دیکھا

کہ اگر کوئی خدا سے نہیں ملا

تو کیا خدا بھی کسی سے نہیں ملا

پھر وہ کون ہے جو اپنے جذب کے حصہ کی آسمانی کنگھی مول لے کے اپنے سر کے بیچ

مانگ کاڑھتا ہے

اس سمے جب اس کے غم دیدہ حصہ کی دنیا میں اس کے لطف نادیدہ کی بارش ہو رہی ہوتی ہے

یا شاید کسی جہان آسودہ کی امید میں کسی جہان نا آسودہ سے گزرنا پڑتا ہے

تب واپس لے جانے کے لئے آیتوں سے شکر کے ایک دانے کو سمیٹ کے

اپنی جگہ لے جانے والی چیونٹیوں کے جماؤ سے پرانی یادوں میں محفوظ رکھی

ہاتھیوں کی قطار سے اعتبار عدم میں ضم ہونا پڑتا ہے

بھول جاؤ کہ تم اس کے لئے سیاہ گلوبند میں چمکتے تین نگوں میں سے کسی ایک نگ میں بھی شامل ہو سکو گے