Kahi Ke In Kahi Har Aik Baat Se Guzra, Urdu Ghazal By Aleem Athar

کہی کہ ان کہی ہر ایک بات سے گزرا

مرا کلام بھی ہر طاق رات سے گزرا

عقیدتا" مرا ذہنِ رسا الجھ نہ سکا

مُروّتا" مٙیں بھی لات و منات سے گزرا

وہ پہلے پہل تو کانوں کے چھید سے جُھولا

مُراد پانے کو پھر سومنات سے گزرا

مٙیں اپنے آپ میں سمٹا تو پُرسکون ہوا

نہ پھر سے کوزہ گروں کے بھی ہاتھ سے گزرا

زمیں پہ بھول بُھلیّاں ہیں اور کچھ بھی نہیں

مٙیں پھیلتی ہوئی ہر کائنات سے گذرا

میں پتھروں کی بھی تہذیب میں رہا پتھر

مرا نصیب چمکتی سی دھات سے گزرا

مٙیں چاند پر بھی ملا چرخے والی بڑھیا سے

رُواں رُواں بھی مرا کات کات سے گزرا

مرا سفر ابھی جاری ہے، منزلیں بھی کئی

میں پہلے بھی تو حیات و ممات سے گزرا

زمانے بھر کے چکائے ہیں قرض جیتے جی

بروزِ حشر بھی پھر واجبات سے گزرا

وہ ابر ہو کے برستا ہے دشتِ عالم پر

وہ دکھ، وہ درد، جو بہتے فرات سے گزرا

دلِ حزیں کی سبھی دھڑکنوں کے صدقے میں

حسیں شباب بھی آخر زکٰوة سے گزرا

طوافِ کوچہءِ جاناں کی خیر ہو اطہر

خدا کے گھر میں اسی واردات سے گزرا