Qisa Dhar Mein Be Naam Hekiyaat Hotay, Urdu Ghazal By Aleem Athar

قصہءِ دھر میں بے نام حکایت ہوتے

ہم حقیقت میں محبت کی ضرورت ہوتے

دل جو مرجان کا ہوتا اور یہ آنکھیں یاقوت

ہم بھی پھر خاک بدن صاحبِ ثروت ہوتے

لب سِلے، ہاتھ کٹے، آنکھ بھی پتھرائی ہے

کاسہءِ عشق اٹھاتے جو سلامت ہوتے

حسرت و یاس بھرے وصل کے امرت دھارے

دشتِ ہجراں میں بھی ہولے سے سرایت ہوتے

آفریں، شکریہ، شاباش، ستائش معدوم

شکوہ و رنج سہی حرفِ شکایت ہوتے

تیرے آنچل کی بُنت میں مری دستار کے تار

باعثِ ننگ، نہ تہمت، نہ عداوت ہوتے

تیری آنکھیں کبھی مصروفِ تلاوت ہوتیں

ہم گناہگار بھی مشغولِ عبادت ہوتے

قتلِ ہابیل نہ ہوتا نہ ہی یوسف بکتے

"خون کے رشتے وفا کی جو علامت ہوتے"

بھوک ہوتی نہ کبھی خون میں لت پت خود سے

پھر سبھی اہلِ ہوس پُتلہ شرافت ہوتے

چند کھنکتے ہوئے سکّوں کے تماشے کے عوض

خوبرو روپ سے بہتر تھا نجاست ہوتے

گر اچھلتے ہوئے پانی میں نہ لذّت ہوتی

روح پر خون کے چھینٹوں کی عبارت ہوتے

ہم نے ہنستے ہوئے یہ جاں بھی نچھاور کر دی

خالی ڈھانچے میں پڑے کس کی وراثت ہوتے؟