Rang Rasiya, Urdu Nazam By Arifa Shahzad

تم درمیان میں آکے کیوں کھڑے ہو

میرے دائرے سے کیسے گزرو گے

تم اسے کاٹ نہیں سکتے

میں نے اپنے دائرے کو توڑ دیا ہے

اور چار سمت خود کو بکھیر دیا ہے

ایک سمت۔۔۔میں اپنے بدن کے رنگ

خود اپنے اندر اتار دیتی ہوں

دوسری سمت خلا کی بے رنگی میں

رنگ گھولتے گھولتے

بے رنگ ہو جاتی ہوں

تیسری سمت،بے دلی کا رنگ دیکھتی رہتی ہوں

اور تیز تیز قدموں سے آگے نکل جاتی ہوں

چوتھی سمت،دل کا رنگ ہتھیلی کی رگوں میں

ڈھونڈتی رہتی ہوں

تکثیریت کی خواہش

نہ کاسنی ہوتی ہے نہ خاکی

انگلیاں کاغذ میں چھپے رنگوں کو

الٹتی پلٹتی رہتی ہیں

اور اندھی کر دیتی ہیں رات کی آنکھ

چچوڑ دیتی ہیں دن کے بدن کی ہڈیاں

اور گھڑتی رہتی ہیں خواب کی خراد پر لفظ

لفظوں کو رنگوں سے آلودہ کرنے سے کیا ہو گا؟

میں تمھارا رنگ پہچانتی ہوں

تم نے مجھے نے نہیں دیکھا

میری تصویر دیکھی ہے

تم میرا رنگ کیسے جان سکتے ہو؟