Steaker Market, Urdu Nazam By Arifa Shahzad

سٹیکر مارکیٹ میں ہے سبھی کچھ

قہقہے،آنسو،تحائف رنگ برنگے

اینیمیٹڈ کارٹونوں کی زبانی

کچھ کہی اوران کہی کی سرحدوں کے بیچ

بے سوچے ہوئے لمحے

دھڑکتا دل بھی ہے

بوسے ہمکتے ہیں

لپکتے بازووں کا رقص ہے

اور عکس ناراضی کا بھی ہے ثبت

جو جی چاہے اب چن لیں

دھریں پوروں پہجو تاثر بھی ہے درکار

سب سکرین کے اس پار پہنچے گا

کہ پھر سکرین کے اس جال میں الجھا رہے گا؟

کون اب جانے؟

سٹیکر ،چیٹ کے سب سلسلوں کا لازمہ ہیں

یہ سائیبر ایج کی رگ رگ میں شامل پلازمہ ہیں

سہارا ہیں ادھوری گفتگو کا

یہ متبادل ہیں شاید

رگوں میں دوڑتی پھرتی نمو کا

کسی خواہش کا چہرہ ہیں

کسی بے چہرگی کا آئینہ ہیں

سٹیکر چار جانب بولتے ہیں

نہ جانے کون سے در کھولتے ہیں؟