بند کریں
شاعری مضامینانتخاب ادب نامہ کی طرف سے عمران عامی کی شاعری سے انتخاب

انتخاب کے مزید مضامین

پچھلے مضامین - مزید مضامین
ادب نامہ کی طرف سے عمران عامی کی شاعری سے انتخاب
نوجوان شاعر عمران عامی کی غزلوں سے چند اشعار یہ شہر تو لگتا ہے۔۔۔۔۔۔۔۔۔۔۔۔۔کباڑی کی دکاں ہے کھوٹا بھی اُسی مول میں بکتا ہے، کھرا بھی

عمران عامی کی غزلوں سے چند اشعار

___________________________________

یہ شہر تو لگتا ہے۔۔۔۔۔۔۔۔۔۔۔۔۔کباڑی کی دکاں ہے
کھوٹا بھی اُسی مول میں بکتا ہے، کھرا بھی
ممکن ہے میں اس بار۔۔۔۔۔۔۔۔۔بھٹک جاؤں سفر میں
اِس بار مرے ساتھ ۔۔۔۔۔۔۔۔۔۔۔۔۔۔۔۔۔ ہوا بھی ہے، دیا بھی
......................
شوقِ گریہ میں اداکاری کیا کرتے تھے
زندہ لاشوں پہ عزاداری کیا کرتے تھے
عشق کے نام سے واقف تھے نہ اِس کام سے ہم
کیفیت خود پہ مگر طاری کیا کرتے تھے
......................
بات دل کو مِرے لگی نہیں ہے
میرے بھائی! یہ شاعری نہیں ہے
جانتی ہے مِرے چراغ کی لَو
کون سے گھر میں روشنی نہیں ہے
......................
چھوڑ سکتے ہیں تری نیند چُرانے کا خیال
ہم تجھے بے سروسامان بھی کر سکتے ہیں
ہم اگر دشت کو آنکھوں میں بسانے لگ جائیں
پھُول چہروں کو پشیمان بھی کر سکتے ہیں
......................
ایک پل آنکھ کیا لگی میری
لے گیا خواب وہ سرہانے سے
دو قدم کے ہی فاصلے پر ہے
ایک مسجد، شراب خانے سے
......................
جنوں کی مان کے آیا تھا رزم گاہ کی سمت
یہ جنگجو بھی مجھے مصلحت سکھانے لگا
جہاں پہ نوحہ گری کا مقام تھا عامی
ہجوم ِ شہر وہاں تالیاں بجانے لگا
......................
ہماری سمت یہ دریا یونہی نہیں آتا
طلب فقیر کو ہوتی ہے آستانے کی
......................
لاؤ کوئی مثال۔۔۔۔۔۔۔۔ ہمارے بغیر بھی
ہم نے کیا ہے عشق تمہارے بغیر بھی
۔......................
ہر اِک حسین پہ اِس کو لُٹا نہیں سکتے
ہمارا عشق غنیمت کا مال تھوڑی ہے
......................
ہمارے اشک اگر طاق پر دھرے رہتے
تو یہ چراغ یہاں خاک پر دھرے رہتے
......................
مجھے چراغ کی عزت کا پاس ہے ورنہ
ہوا تو پاؤں پکڑتی ہے روز آ کے مرے
فقط کتابیں نہیں خواب بھی پڑے ہوئے ہیں
تُو دیکھ سکتا ہے کمرے میں یار جا کے مرے
......................
شاخِ گریہ پہ گُل ِ تازہ نہیں آنے کا
باغ سکتے میں ہے آوازہ نہیں آنے کا
......................
ورنہ ہم لوگ کم و بیش میں آ ہی جاتے
دشت نے قیس کی تشہیر زیادہ کی ہے

عمران عامی

(0) ووٹ وصول ہوئے

: مضامین سےمتعلقہ شعراء