Aaise Nahi Hota, Urdu Nazam By Ashfaq Hussain

بس اک اپنے تحفظ کے لیے

دنیا کو کتنا بے تحفظ کر دیا تم نے

یہ دنیا وہ نہیں

جو آج سے پہلے تھی

یہ فرمان جاری کر دیا تم نے

مگر تم کون سی دنیا میں رہتے ہو

یہ دنیا تو وہی ہے

جس میں جب چاہو

تم اپنے حکم منواتے ہو

طاقت کی زباں میں بات کرتے ہو

تمہارے حکم کو جو ماننے میں دیر کرتے ہیں

تم ان کو اپنی دہشت سے ڈراتے ہو

شکستہ ہڈیوں کو آتشیں تنور کا ایندھن بناتے ہو

جو مفلس ہیں انہیں تم اور بھی مفلس بناتے ہو

یہ دنیا آج سے پہلے بھی

کب محفوظ تھی اتنی

مگر محفوظ تھے تم اپنی دیواروں کے اندر

اور اس دیوار کی ایک اینٹ

آج اپنی جگہ سے ہل گئی ہے

صرف اک اینٹ

اور قیامت مچ گئی ہے

ذرا سی چوٹ کو

حوا بنا رکھا ہے تم نے

آسماں سر پر اٹھا رکھا ہے تم نے

حساب خوں بہا کے نام پر

دنیا میں ہنگامہ مچا رکھا ہے تم نے

مگر اپنا حساب خوں بہا لینے سے پہلے

گنو سب حسرتیں جو خوں ہوئی ہیں تن کے مقتل میں

صنم دکھلائیں گے راہ خدا ایسے نہیں ہوتا

جو تم کہتے ہو سب کچھ ہو چکا ایسے نہیں ہوتا