Yaad Hai Wo December Jab Tum Aaye Thay, Urdu Nazam By Asma Tariq

یاد ہے وہ دسمبر جب تم آئے تھے

سب تمہارے لیے تیاریوں میں مصروف تھے

ہر طرف تمہاری آمد کی شادمانی تھی

بس اک میں تھی جو تم سے نالاں تھی

بچپن کا یہ رشتہ میری سمجھ سے بالاتر تھا

مجھے تم تب اپنی راہ کا وہ کانٹا دکھتے تھے

جو نہ ہوتے ہوئے بھی پیر زخمی کر رہا ہو

جب تم آئے تو

سب کتنا خوش تھے

اور تم چالباز بھی کتنے تھے

آتے ہی ایسے کام میں جت گئے

اماں کے تو تم پسندیدہ بن گئے

یہ بات مجھے اور ستا رہی تھی

تم نے آتے ہی میرے گھر والوں پر قبضہ کر لیا تھا

پر میں نے بھی تمہیں جھٹلانے کی ہر وہ کوشش کی

جو تمہیں ناگوار گزرتی

اور تم اس بات واقف تھے

شاید تمہیں برا بھی لگا ہو

مگر میرے لیے تمہیں اچانک قبول کرنا ناممکن تھا

تم ایک طوفان کی ماند آئے تھے

اور میری زندگی میں طوفان برپا کر کے چلے گئے

مگر اس دسمبر کے بعد

ہر دسمبر تمہارے انتظار میں رہتا ہے

شاید تم آو

مگر تم نہیں آتے

شاید کہ ناراض ہو

اور مجھے منانا نہیں آتا

مگر سنو ابھی ایک بات ادھوری رہتی ہے

جسے مکمل ہونا چاہیے

شاید یہ دسمبر بھی اسی آس میں گزر جائے۔