Mira Khatt, Urdu Nazam By Asna Badr

کبھی ایسا بھی ہوتا ہے

میں انجانے پتے پر ایک خط لکھ کر

سپرد ڈاک کرتی ہوں

جو دل میں معاملات دل ہیں سب

صد چاک کرتی ہوں

میں لکھ دیتی ہوں ان کے نام بھی جن سے شکایت ہے

بتا دیتی ہوں کس کس سے مجھے کتنی محبت ہے

تعارف ان کا بھی جن سے بہت نقصان پہنچا ہے

جنہیں پانے کو صحرا تک دل ویران پہنچا ہے

رقم کرتی ہوں کس کا دل دکھا ہے واقعی مجھ سے

بیاں کرتی ہوں کیوں روٹھی رہی ہے زندگی مجھ سے

غلطیاں ہیں جو میری سب سر اوراق رکھتی ہوں

اور ہر صفحے پہ اپنے دستخط مصداق رکھتی ہوں

مگر ایسا بھی ہوتا ہے

کوئی دستک سی ہوتی ہے

نہ جانے درمیان شب یہاں پر کون آتا ہے

مری دہلیز پر آ کر مرا خط ڈال جاتا ہے