Suna Hai Chandni Raatoon Main Aksar Tum, Urdu Nazam By Asra Rizvi

خموشی سے دبے پاؤں

بھری محفل سے اٹھتے ہو

کھلے آکاش کے نیچے کہیں پر بیٹھ جاتے ہو

پھر اپنا ہاتھ ہولے سے بڑھاتے ہو

چمکتے چاند کی جانب

کبھی تو مسکراتے ہو کبھی کچھ گنگناتے ہو

جو میرؔ و دردؔ کی غزلیں کبھی ہم کو سناتے تھے

وہی سرگوشیاں مجھ سے جو اکثر کرتے رہتے تھے

ہوا کے دوش پر بیٹھی کرن سے کرنے لگتے ہو

سنا ہے بے قراری میں

ٹہلتے ہو کبھی چھت پر

کبھی ہر عکس میں میرا سراپا ڈھونڈھتے ہو تم

ہواؤں میں مری خوشبو کبھی محسوس کرتے ہو

کبھی بے آس ہو کر پھر زمیں پر بیٹھ جاتے ہو

بہت فریاد کرتے ہو

مجھے ہی یاد کرتے ہو

مگر یہ ساری باتیں تو محض خوابوں کی باتیں ہیں

کھلی جب آنکھ میری تو نظارہ اور ہی دیکھا

کوئی پیغام آیا تھا

ہمارے نام آیا تھا

لکھا تھا اس میں دیکھو نا

کہ اب کی چاند جو نکلا

اسے نزدیک سے دیکھا

اسے محسوس کر پایا

مکمل پا لیا اس کو جو شہ رگ میں مچلتا تھا

مبارک باد تو دے دو وہ میرا ہو گیا اب کی

سنا ہے چاندنی راتوں میں تم بھی سو نہیں پاتی

تو اب کی چین سے سونا کہ اب میں بھی نہیں جگتا