Rasm, Urdu Nazam By Atif Tauqeer

teri parchhain tere baad bhi ghar bhar mein phirti hai
kabhi gul-dan mein uljhe hue
phulon ki KHushbu ki
safen tartib deti hai
kabhi sajde mein sar rakkhe
giri bikhri kitabon ki
jamaat ki jabinon par lagi barson ki gard aur dhul
palkon ki nami se Dhoti almari mein qade banTi takbir deti hai
darud-e-dosti se peshtar
daen taraf ke hath ki ungli uTha kar
ek shahadat ek gawahi
nam kar deti hai chahat ke
kabhi aaine mein apni purani dastan ki aayaton ka wird karti hai
kabhi chaukhaT pe aa ke yaad ki tasbih karti hai
piro leti hai danon mein
ki har dane pe tera nam paDhti hai
magar ginti nahin karti
ki har taintis danon baad ek chhalla nahin aata
kabhi in panj-waqta khiDkiyon se dhup ke minar par chaDh kar
ye hai-ala-ssalat-e-dil ki gunjen chaak karti hai
faza namnak karti hai
nigahon ke ghaDe se pani chhalka kar wuzu
ya phir nigahen KHushk ho jaen
to bite waqt ke ek lams se tadbir ki surat
tayammum se meri likkhi hui nazmen tilawat karne lagti hai
subh se sham hone tak
kisi taswir ko kaba banati hai
tawaf karti jati hai
na jaane kaun se kitne manasik yaad ne
parchhain ke sar bandh rakkhe hain
ye sare kashT karti hai
par aaKHir mein
wahi ek aaKHiri sunnat nibhati hai
ye apne aap ko har sham
aangan mein gira kar
haar ko taslim kar ke
rasm ke ek khurdure KHanjar se
bin takbir hi
qurban hoti hai