Iss Nigah Naaz Ne Yun Raat Bhar Tajseem Ki, Urdu Ghazal By Aurang Zeb

اس نگاہ ناز نے یوں رات بھر تجسیم کی

سب چراغوں میں برابر روشنی تقسیم کی

رات پیچھے پڑ گئی تھی خوف کے سائے لیے

خواب سے آگے نکل کر وقت میں ترمیم کی

آئنہ ہو جائے گا یہ دشت مجھ پر ایک دن

گرہیں کھلتی جا رہی ہیں احسن تقویم کی

دونوں ہی آ کر الف کی روشنی میں ضم ہوئیں

اک تجلی لام کی اور اک تجلی میم کی

شہد کا بھی ذکر ہو سکتا تھا ہونے کو مگر

اس کے لہجے کے مطابق بات چھیڑی نیم کی

میں ہی تھا اپنے مقابل خواہشوں کی ڈور میں

ہارنا مشکل لگا سو جیت ہی تسلیم کی

دوست لیکن تجھ کو یہ عزت نہ راس آئی کبھی

میں نے اپنے آپ سے بڑھ کر تری تکریم کی

شام ہوتے ہی چراغوں کو سجایا طاق میں

سارا دن سو کر گزارا رات کی تعظیم کی

عمر بھر سورج کے آگے ہاتھ پھیلائے مگر

اک ستارے نے مجھے یہ روشنی تعلیم کی

کھینچ کر افلاک پہ اک سرمئی روشن لکیر

چاند نے صورت بدل ڈالی ہماری تھیم کی

میں نے زیبؔ اس کو محبت میں کہا تھا مجھ سے مل

اس نے میری بات کی کتنی غلط تفہیم کی