Dekh Kar Joban Tra Kis Kis Ko Herani Hui, Urdu Ghazal By DAGH DEHLVI

شک

دیکھ کر غیروں کا مجمع کیا پریشانی ہوئی

دعویٰ تسخیر پر یہ اس پری وش نے کہا

آپ کا دل کیا ہوا مہر سلیمانی ہوئی

کھل گئیں زلفیں مگر اس شوخ مست ناز کی

جھومتی باد صبا پھرتی ہے مستانی ہوئی

میں سراپا سجدے کرتا اس کے در پر شوق سے

سر سے پا تک کیوں نہ پیشانی ہی پیشانی ہوئی

دل کی قلب ماہیت کا ہو اسے کیونکر یقیں

کب ہوا مٹی ہوئی ہے آگ کب پانی ہوئی

آتے ہی کہتے ہو اب گھر جائیں گے اچھی کہی

یہ مثل پوری یہاں من مانی گھر جانی ہوئی

عرصۂ محشر میں تجھ کو ڈھونڈ لاؤں تو سہی

کوئی چھپ سکتی ہے جو صورت ہو پہچانی ہوئی

دیکھ کر قاتل کا خالی ہاتھ بھی جی ڈر گیا

اس کی چین آستیں بھی چین پیشانی ہوئی

کھا کے دھوکا اس بت کمسن نے دامن میں لیے

اشک افشانی بھی میری گوہر افشانی ہوئی

بیکسی پر میری اپنی تیغ کی حسرت تو دیکھ

چشم جوہر بھی بشکل چشم حیرانی ہوئی

بیکسی پر داغؔ کی افسوس آتا ہے ہمیں

کس جگہ کس وقت اس کی خانہ ویرانی ہوئی