Kalam E Muhabbat, Urdu Nazam By Dr Nighat Nasim

اے متاع چشم

میں سمندر کنارے کھڑی تمہیں ہی سوچ رہی ہوں

دل ہی دل میں دعا مانگ رہی ہوں

ہماری محبت کو

سمندروں جیسا دوام رہے

لہروں جیسی وارفتگی رہے

کبھی نا ختم ہونے والی روانی رہے

ہماری محبت

اتنی نرم روی سے ہمارے دل پر دستک دے

ریت کے ساحل پر جیسے جھاگ آتی ہے

خدا کرے

ہمارا ساتھ سمندروں جیسا وسیع و دلنشین ہو

جس کی صبح بھی روشن اور شام بھی حسین ہو

ہماری محبت کا سورج سدا طلوع رہے

اے متاع فخر

تمہارے کف دست پر اپنا ہاتھ رکھ کر

اپنے یقین کو اپنا ہم قسم بناتی ہوں

ہماری محبت

لہروں کی طرح ایک دوسرے کی ڈھارس رہے گی

سمندروں کے مزاج جیسی ہمیشہ ساتھ رہے گی

جب زمین کو پانی سیراب کرتا ہے ۔۔ پھل پھول اگتے ہیں

ہماری محبت بھی

ہم دونوں میں پھل پھول لگائے گی

ہمیں تمام عمر شجر ثمربار رکھے گی