Yeh Lutf Yeh Musarat Kiya Hai, Urdu Nazam By Dr Nighat Nasim

میرے محبوب

تمہیں یاد ہے

چاندنی راتوں میں

ہم عود و عنبر جلاتے تھے

کسی قدیم ساز پر کوئی راگنی بجاتے تھے

آن ہی آن میں

ہمارے سینوں سے غموں کا بوجھ اتر جاتا

ساری احمقانہ خواہشیں رخصت ہو جاتیں

بڑائی کی فضول سی امنگیں دم توڑ جاتیں

تم محبت سے پوچھتے

جانم اس خوشبو کی ماہیت کیا ہے ۔۔؟

میں کھوئے ہوئے لہجے میں پوچھتی

خوشبو کے دھوئیں کا رنگ کیسا ہے ؟

اور جب۔۔

کھڑکھیوں کے جھل مل پردے ہوا کی لے پر جھومتے تو بے اختیار ہو کر کہتی

دیکھو وہ سایہ کیسا گزرتا جا رہا ہے ؟

تم میرے ہاتھوں کو تھام لیتے ۔۔ چوم لیتے۔۔ پوچھتے

تمہاری انگلیوں کی پوروں میں سے کیسی آواز چھن چھن کر آرہی ہے ۔۔۔؟

میرے محبوب

یہ لطف ۔۔یہ مسرت کیا ہے ؟

جس نے برسا برس سے ہمیں وشال کر رکھا ہے

دنیا کی ہر حقیقت بے معنی سی بنا رکھی ہے

میں سوچ رہی ہوں ۔۔۔۔

ہمارے سامنے

اس لامحدود کائینات کی حقیقت کیا ہے ؟