Tafseel Masafat Ki, Urdu Nazam By Fahmida Riaz

اک دن جو بہم ہوں گے

تجھ سے ترے درماندہ

کیا عرض گزاریں گے

کیا حال سنائیں گے

موہوم کشیدہ ہے

تصویر قیامت کی

شاید نہ سنا پائیں

تفصیل مسافت کی

لب بستہ رہیں شاید

یہ دن جو گزارے ہیں

محرم ہے کوئی کس کا

یا زخم کی سرگوشی

یا ہمارے ہیں

آنکھوں پہ کئے سایہ

کب دور تلک دیکھا

لرزاں تھی زمیں کس پل

کب سوئے فلک دیکھا

کب دشت کی تنہائی

آنکھوں میں اتر آئی

کب وہم سماعت تھی

کب کھو گئی گویائی

کس موڑ پہ حیراں تھے

کس راہ میں ویراں تھے

اجمال حقیقت کے

شاید نہ رقم ہوں گے

اک دن جو بہم ہوں گے

تک لیں گے تری صورت

اور سر کو جھکا لیں گے

مل ڈالیں گے آنکھوں کو

گر یاد سراب آئے

گم صم تری چوکھٹ پر

ہو جائیں گے ہم شاید

چھو کر ترے دامن کو

سو جائیں گے ہم شاید