Haal Ka Maazi, Urdu Nazam By Fakhra Noreen

یہی بالشتیوں کا مسئلہ تھا اور اب بھی

یہ روایت ہے

کہ جب کوئی قدِ آدم چلا آتا ہے

ان کی بستیوں میں اور

ان کی اپنی کوتہ قامتی اک مضحکہ

محسوس ہوتی ہے

تو سب بونے،سبھی بالشتیئے

مل کر

طویل القامتی کے رد میں

اوراس کی مذمت میں

کچھ ایسے ہجو گاتے ہیں

کہ خوداپنی ہی آوازوں کی پستی

اور اپنے بے سرے پن کو

سنیں تو کان بہرے ہوں

مگر وہ انگلیاں کانوں میں ٹھونسے

گائے جاتے ہیں

مرے قائد!

مجھے تیری زمیں کے

ان سبھی بالشتیوں پر

رحم آتا ہے

جو ناشکرے ہیں،بے کردار ہیں

بے کار ہیں،اک بوجھ ہیں

دھرتی کے سینے کا

یہی بالشتئے مصروف ہیں

ہرزہ سرائی،ہجو گوئی میں

انھیں یہ کون بتلائے،انھیں یہ کون سمجھائے

کہ ان کی کھوکھلی دانش کے کاسے میں

کھنا کھن بجتے سکے سارے کھوٹے ہیں

مجھے تو رحم آتا ہے

کوئی ان سے ذرا کہہ دے

کہ ان کی بے سری،بھدی صدائیں

سن کے جب کوئی

ذرا بھی سر اٹھائے تو وہ دیکھے گا

ترا قامت تو اپنی ذات میں بھی اک حقیقت ہے

مگر تیرے مقابل آنے والے

بے حقیقت،ہجو گو بونے

ترے مدِمقابل اور بھی

کوتاہ قامت دکھنے لگتے ہیں