Pashmena Shawl Ka Jeevan, Urdu Ghazal By Fakhra Noreen

مائے نی میں داج کی پیٹی میں بند ایسی چادر

جس کو کبھی نہ اوڑھے ماہی

کبھی نہ جسے بچھائے

سرد رتوں کی ٹھار میں

ٹھٹھرے میرے سب گل بوٹے

جن کے اندر تو نے سارے خواب کبھی تھے کاڑھے

جن کے ظاہر رنگ تھے اور باطن تھے رس گاڑھے

نہ بکل ماری نہ کسی نے آکر بھرا کلاوہ

ان بوٹوں پر آکر کوئی بھنورا کبھی نہ بیٹھا

میں رس کی بند گاگرتھی لیکن کس نے آچکھا

مائے نی

میں گرم رتوں کی گرمی میں گھبرائی

ماہی تو پردیس میں

میری سار نہ لیتا کائی

ساون میں دم گھونٹتا پیٹی کے اندر حبس

کِن مِن کِن مِن باہر اور اندر ہوتی بوچھاڑ

جب پیٹی منہ کھولے تو

میں پل بھر سامنے آؤں

پھمن بمبل دیکھ کر کتنی آنکھیں للچائیںِ

تن کی منڈیروں پر ہو نت کائیں کائیں کائیں

آ کاگا پھر کھائیو توچن چن تن کا ماس

پہلے آنکھیں کھا جنہیں ہے پیا ملن کی آس

مائے نی

کیا سوچ کر لکھے گئے بھاگ ہمارے

یہ ساری نرماہٹیں، گدرایا تانا بانا

اندر سے کھائیں ٹڈیاں ،باہر سے سیلن مارے

مائے نی

میں پشمینہ کی چادر کاش نہ ہوتی

ململ کے سکھ دیکھتی ،

کھل ہنستی اور کھل روتی