Seeta Main Tujh Se Baghi, Urdu Nazam By Fakhra Noreen

عجب مصیبت میں گھر گئی ہوں

گئ رتوں میں، میں جتنی چاہت سے تیری قربت کی لذتوں سے کشیدتی تھی،

وہ انگبیں مے سے سرخ لمحات ِ پرمسرت،

کہ جن کے آنے کی چاپ میرے لہو سے باہر بھی بولتی تھی، میں ایک اک لمحہ کتنی شدت بھری ترازو میں تولتی تھی،

تو وصل رت کی وہ لحظہ لحظہ سرکتی ریشم کی شال

تن سے اتر کے بھی ساتھ لپٹی رہتی،

میں ہجر میں بھی مہکتی رہتی،

مگر میں اب اپنی شدتوں ہی سے ڈر گئی ہوں تو سوچتی ہوں، کہ دستیابی میں شدتوں کا جواز کیا ہے،

مری سہولت کے دایرے میں پڑے ہوئے شخص کچھ تو بولو،

مجھے بتاؤ گے راز کیا ہے؟

اجازتوں سے بھرے علاقے میں رہنے والو !

کوئی تو بولو،

وفورِ جذبات کیا بلا ہے؟

یہ کیا وبا ہے کہ ما تیسر کی آرزو جان لے رہی ہے،

میں اس قناعت سے ڈر گئی ہوں،

عجیب نفرت سے بھر گئی ہوں

۔میں ۔۔۔۔۔مرگئی ہوں