Sihalath Siam Spa, Urdu Nazam By Fakhra Noreen

نیم تاریک کمرہ عجب سی حرارت سے دہکا ہوا

سرخ،زرتار رنگوں سے معمور ماحول مہکا ہوا

، دوووور سے دھن کوئ رفتگاں کی طرح

غیر محسوس موجودگی کی مہک

اپنے ہونے کا احساس دیتی ہوئ

نیم تاریک کمرے کی دیوار پر

حرفِ سادہ کی مانند مانوس طغروں پہ

لکھے ہوئے دلکشیں نقشِ دل

ایسے ماحول میں

ہاتھ پورے بدن پر پھسلتے ہوءے

درد چنتے ہوئے

اک بدن چیختا اور دوہاتھ خاموش سنتے ہوئے

جسم کے کرب کو بولتے ہاتھ کیسے سمجھ پائیں گے

وہ کہ واقف ہیں ہر لطف انگیز سسکی کی آواز سے

ہڈیوں میں گندھی مستقل اک تھکن،

کتنی گہری اترتی چلی جاتی ہے،

مو بہ مو پھیلتا اک تناؤ جسے ہجر تو ہجر ہے

وصل دونا کرے

درد جاگا ہی رہتا ہے سوتا نہیں

اور بدن بولتے ہاتھ کی صرف سنتا ہے،

محوِ تکلم تو ہوتا نہیں

بولتے ہاتھ جو صرف ہنستے ہوئے جسم سے آشنا ہیں

انھیں کیا خبر

ہاتھ کو خود فراموشی لازم ہے

درد سننے کو خاموشی لازم ہے