Apahaj Lehje Murda Nazmain, Urdu Nazam By Faqeeh Haidar

مری نظمیں

تری نظمیں اپاہج ہیں

سراسر چل رہی ہیں مصلحت کی آڑ میں بیساکھیوں پر بس

لہو کے سامنے لاشوں کے پیچھے خاک کے نیچے

مقابل قاتلوں کے بے کفن اجسام سے

لپٹے ہوئے ان چیتھڑوں سے اٹھ رہا ہے جو تعفن ہے قسم اس کی ہماری رائگانی سے جڑی سطریں ہیں گونگی اور

نظمیں بھی اپاہج ہیں

کہ نظمیں تو ضمیروں کی عفونت سے بھرے حرفوں

کی لاشوں سے نکلتے خون کی سرخی

کا سرنامہ بنیں تو پھر

کوئی کہتا ہے نظمیں ہیں

ہم ایسے بے ضمیروں کے قلم جھوٹے علم جھوٹے

ہنر کاری پلیدوں کے قصیدوں میں سدا غرقاب رہتی ہے

ہمارے ہاتھ گندی نالیوں میں غسل کرتے ہیں

ہمیں ہر گز نہیں ہے حق

لکھیں انسانیت پر درد ناموں کے صحیفے سوگ کے کلمے

کہ ہم سچے منافق ہیں

کہ ہم پکے منافق ہیں

ہمیں ،،ابن ِ ابی ،،مذہب

،،ابو جاہل ،،عقیدوں کی اشاعت میں دماغوں کو کھپانا ہے

چراغوں کو جلانا ہے

خدا کیسا ہے رہتا ہے

کہاں کیوں ہے

نہیں یہ سوچنا بلکل

زمینوں پر ہمیں بس پھونکنا ہے دم دما دم صور

منافق مسلکوں والے کبھی سوچا نہیں کرتے

ہماری نیکیاں سارے گناہوں سے مقدس ہیں

منافق ہیں

قلم توڑیں

علم چھوڑیں

مناجاتیں ، دعائیں مرثیے ، نوحے، لکھیں سجدے، کریں ماتم کناں

لہجے لیے

بجھے چہرے سجائیں طاقچوں میں فرق پڑتا ہے کوئی سوچو ؟؟

لہو بکھرے

لہو پھیلے

لہو سوکھے

لہو سے خاک کا ملبوس مہکے مقتلوں میں ہوں اجالے بھی ہمیں کیا ہو

ہمیں کیا ہو آخر کو

لہو انسان کا ہو یا کسی حیوان کا اپنے لیے پانی سے بڑھ کر نہیں کچھ بھی

کرو قتال خوں سے شہر کر دو سارے جل تھل قاتلو

ہم نے مذمت مصلحت سے سبھی برداشت کرنا ہے

کہ ہم نظمیں لکھیں بھی تو سمجھنا یہ غلاظت ہیں

یہ بوڑھی ہیں

اپاہج ہیں

،،منافق دور ،،میں لکھی ہوئیں سبھی نظمیں بروز حشر ان دکھاوے کی نمازوں کی طرح منہ پر پڑیں گی دیکھنا ساری