Dil Main Soye Sare Dard Jagata Hai, Urdu Ghazal By Fareeha Naqvi

دل میں سوئے سارے درد جگاتا ہے

بن موسم کی بارش, ایسا نوحہ ہے

میں نے آخری خط میں بس یہ لکھا ہے

"تم نے ....میرے بارے میں... کیا سوچا ہے...... ؟ "

پھر سے جانا چاہا تھا؟ تو کہہ دیتے

پہلے کتنی بار، بتاؤ! روکا ہے

ناراضی میں ہجر کی دھمکی دیتا ہوں

سچ پوچھو تو سوچ کے بھی دل ڈرتا ہے

دل کے در پر تیری یاد کے پتھر نے

ہر آنے والے کا رستہ روک کے رکھا ہے

دن کے اجلے رنگ نہ تم کو بھاتے تھے

دیکھو میں نے شام کا آنچل اوڑھا ہے

آج بدن میں ایک عجب بے چینی ہے

خون ہے یا تیزاب رگوں میں چلتا ہے؟

آنکھ اور بادل دونوں ٹوٹ کے روتے ہیں

جانے ان کا آپس میں کیا رشتہ ہے

کچھ تو فقط محفل کی رونق ہوتے ہیں

پھر ان کو شاعر بھی بننا پڑتا ہے

کوئی تو سچ کہنے کی ہمت لے آئے

یا پھر یونہی بیٹهے کڑھتے رہنا ہے؟

کیا اس درجہ بدعنوانی جائز ہے؟

کس کا شعر تھا ، کس کے باغ میں مہکا ہے