Jab Hum Pehli Bar Milay Thay, Urdu Nazam By Farooq Bakhshi

جب ہم پہلی بار ملے تھے

موسم کتنا اجلا تھا

میں تھا اک آزاد پرندہ

نیل گگن میں اڑنے والا

تم بھی اتنے عمر رسیدہ کب تھے

بالوں میں یہ چاندی کب تھی

لہجے میں کھنک آنکھوں میں چمک تھی

بات بات پر زور سے ہنسنا

عادت میں بھی شامل تھا

سب کے دکھ سکھ کا حصہ بن جانا

فطرت میں بھی شامل تھا

لیکن اب ایسا لگتا ہے

تم سے بچھڑنے کا پل

شاید آ پہنچا ہے

تم سے بچھڑ کر کل میں جب

اس موڑ پہ پھر واپس آؤں گا

سارے رستے سب دیواریں اور دروازے

مجھ سے میرے ساتھ کے بارے میں پوچھیں گے

رام نارائن اور کیدار بھی

پھر یہ راز نہ کھولیں گے

اور مری آنکھوں میں سارا منظر

دھندلا دھندلا ہو جائے گا

لیکن میں بیتے لمحوں سے

پھر اس کو اجلا کر لوں گا

اور پھر یاد مجھے آئے گا

جب ہم پہلی بار ملے تھے

موسم بالکل ایسا ہی تھا