Torr Per Kiya Munhesar Hai Jiss Taraf Jata HooN Main, Urdu Ghazal By Fazal Husain Sabir

طور پر کیا منحصر ہے جس طرف جاتا ہوں میں

تیرے جلوے کی جھلک ہر چیز میں پاتا ہوں میں

عالم غربت میں تنہائی سے گھبراتا ہوں میں

یاد احباب وطن سے دل کو بہلاتا ہوں میں

ہائے مستی میں نہیں رہتا زباں پر اختیار

باتوں باتوں میں نہ کہنے کی بھی کہہ جاتا ہوں میں

اے عدم کے جانے والو کوئی دم کی دیر ہے

مستعد ہوں میں بھی آنے کے لیے آتا ہوں میں

منزل مقصود تک پہنچوں یہی دھن ہے مجھے

دم نہیں لیتا کہیں بڑھتا چلا جاتا ہوں میں

مختصر روداد ہے یہ بے قراری کی مری

خود تڑپ کر دیکھنے والوں کو تڑپاتا ہوں میں

کیا کسی کا حسن ہے غارت گر تاب و تواں

دیکھتے ہی اک جھلک بے ہوش ہو جاتا ہوں میں

میری ہستی ان کی محفل میں گراں خاطر نہیں

صورت باد صبا جاتا ہوں میں آتا ہوں میں

دے رہے ہیں کیا مجھے جینے کے طعنے بار بار

نا مناسب ہے مرا جینا تو مر جاتا ہوں میں

اہل محفل کو سناتا ہوں مضامین بہار

طبع رنگیں کے ذریعہ پھول برساتا ہوں میں

گرچہ قطرہ تھا مگر دریا میں ملنے کے سوا

موج بن کر سطح پر دریا کی لہراتا ہوں میں

بار خاطر ہے اگر محفل میں میرا بیٹھنا

کیسی محفل لو زمانے سے اٹھا جاتا ہوں میں

در حقیقت میرے حق میں موت کا پیغام تھا

ان کا یہ کہنا خدا حافظ ترا جاتا ہوں میں

ناخن تدبیر سے تقدیر کا لیتا ہوں کام

اپنی ہر الجھی ہوئی گتھی کو سلجھاتا ہوں میں

میری استدعا پہ مجھ کو ٹالنے کے واسطے

کہہ دیا ظالم نے اچھا تم چلو آتا ہوں میں

قوم پر ہو کر تصدق قوم پر ہو کر نثار

غازیان قوم کی تاریخ دہراتا ہوں میں

کیوں نہ ہو صابرؔ مرے شعر و سخن میں پختگی

معتقد جب حضرت ناسخؔ کا کہلاتا ہوں میں