Chalo Bazar Chalte Hain, Urdu Nazam By Firoz Natiq Khusro

kisi ki jeb se naqadi
kisi ke kan ki baali
kisi ki chuDiyan
hathon se
mahnga koi mobile
jhalak T-T ki dikhla kar
jo mala TuT kar bikhre
to moti bin lete the
gharibon ki bhi kul-punji
abhi kal tak yahan hum
chhin lete the

magar ab log bhi apne bahut hushiyar bante hain
shikasta hi sahi
phir bhi hamari rah ki
diwar bante hain
na kanon mein koi baali pahanta hai
na hathon mein
kaDe sone ke hote hain
dulhan ke jo bhi zewar hain
wo masnui
jo mobile hain wo naqli
numaish ke sabhi taur-o-tariqe
khokhle hain
kuchh nahin asli

to phir bazar ja kar kya karen
jeben to hain KHali
chalo kuchh aisa karte hain
kisi ke hath se thaila dawaon ka
lapak kar chhin lete hain
dawaen bhi to mahngi hain
kahin par bech dete hain

kahin par bech dete hain
ya phir ghar ko palaTte hain
abhi kuchh roz pahle hi
jo hum ne baaliyan kanon se nochi thin
wo main ne tohfatan baKHshin thin biwi ko
kaDe sone ke amman ko
to phir kuchh aisa karte hain
kaDe amman se ja kar chhin late hain
wahi do baaliyan sone ki jo baKHshin thin biwi ko
unhen phir noch late hain
chalo bazar chalte hain