Zamin-e-zarafat, Urdu Nazam By Ghaus Khah Makhah Hyderabadi

mere dil mein achanak ye KHayal aaya
zarafat ki zamin banjar paDi hai
main is ki aabyari kar ke dekhun
zara nam ho to shayad ye bahut zarKHez ho jae
ye meri arq-rezi se to kuchh nam ho gai hai
ab is banjar zamin mein KHwah-maKHwah mein
tabassum ke jo thoDe bij boe ja raha hun
kal in mein se hansi ki
nannhi konplen hans hans ke phuTengi
phir in hi konpalon mein
qahqahon ke phul aaenge
kuchh aise phul bhi the
jo khila karte the pahle bhi
magar waqif na the
KHud apni bhini bhini KHushbu se
saliqa sikh jaegi hawa bhi dhire dhire
ki kaise chumte hain
adh-khili kaliyon ko phulon ko
chaman mein bulbulon ka aur bhanwaron hi ka raj hoga
ijazat hi na hogi daKHle ki tab bagulon ko
chalegi jab hawa sher-o-suKHan ki
hansi aur qahqahon ke phul apne sar hila kar
kuchh is andaz se wo dad denge ahl-e-fan ko
faza mein bhini bhini un ki KHushbu phail jaegi
aur is tarah zarafat ki wahi banjar zamin bhi
ek hanste khilkhilate aur KHushbu se moattar
sarasar KHitta-e-sarsabz-o-shadab ban kar
dukhi aazurda-KHatir gham ke maron ko
hansi aur qahqahon ki neamaton se
sab ko mala-mal kar degi
isi tarah jahan tak ho sakega
masarrat aur KHushi ke git naghme
mila kar un ke sur mein apna sur gaunga main bhi
sawab-e-jariya paunga main bhi