Thak Thak Gaye Hain Ashiq Darmandah Fghan Ho, Urdu Ghazal By GHULAM MAULA QALAQ

تھک تھک گئے ہیں عاشق درماندۂ فغاں ہو

یا رب کہیں وہ غفلت فریاد بے کساں ہو

یا قہر ہے وہ شوخی یا پردہ ہے نظر کا

دل میں تو اس کا گھر ہو اور آنکھ سے نہاں ہو

یہ شور بھر رہا ہے فریاد کا جہاں میں

جو بات لب پہ آئی الٹی پھری فغاں ہو

کس کس دعا کو مانگیں کیا کیا ہوس نکالیں

اک جاں کدھر کدھر ہو اک دل کہاں کہاں ہو

برگشتگیٔ قسمت یہ چھیڑ کیا نکالی

جو مدعائے دل ہو وہ مدعیٔ جاں ہو

مقدور تک تو اپنے تجھ سے نبھائیں گے ہم

بے جان و دل ہیں حاضر گر قصد امتحاں ہو

صیاد میں نہیں ہوں گم کردہ آشیاں ہوں

اے ہم صفیرو بولو کس جا ہو اور کہاں ہو

اے آہ دل سے اٹھ کر لب پر ہے کیا تأمل

جا شورش زمیں ہو آشوب آسماں ہو

مٹ مٹ کے بھی ہمارا اک بن رہے گا ساماں

اجڑے اگر بہاراں آبادیٔ خزاں ہو

جب بیٹھنے پہ آئے اے ضعف بیٹھ رہیے

پھر کیا ہے یہ تکلف اس کا ہی آستاں ہو

تو ہی رہے گی بلبل یا میں ہی اس چمن میں

یا تیرا ہی ہو قصہ یا میری داستاں ہو

میرے سخن میں کیا ہے کچھ خال و خط بیاں ہے

پر دل سے اس کے پوچھے جو کوئی نکتہ داں ہو

میرا سلام کہنا جھک کر قلقؔ وہی ہے

اس کی گلی میں بیٹھا موزوں سا جو جواں ہو