Ali Mohsin MBA, Urdu Nazam By Haris Khalique

علی محسن کے ماموں لٹ کے انبالہ سے جب لاہور آئے تھے

کلام پاک علم اور سجدہ گاہیں ساتھ لائے تھے

چنانچہ ان کے گھر میں مستقل دلدل بھی پلتا تھا

ہمیشہ نو محرم کو علم گھر سے نکلتا تھا

ہر عاشورے علی محسن بڑے ماموں کے گھر لاہور ہوتا تھا

وہیں دو چار دن رک کر کراچی جب وہ آتا تھا

تو بیڈن روڈ کے امرتسری حلوائی سے امی اور ابا کے لیے

لڈو بھی لاتا تھا

علی محسن کے ابا جی بڑے ہی پاک طینت تھے

مگر ان کے پکھوڑوں اور کمر پر مستقل خارش سی رہتی تھی

علی محسن کی امی کینہ پرور تھیں

مگر بیٹا تو بیٹا تھا

سو کہتی تھیں بہو جب گھر میں لاؤں گی

پھٹیں گی تب تری آنکھیں

چڑھاوا جب چڑھاؤں گی

وہ اس پر کچھ نہ کہتا تھا

وہ ان دونوں سے ویسے بات یوں بھی

کم ہی کرتا تھا

وہ امی اور ماموں کے لیے لاہور تو جاتا

مگر دیں دار لوگوں سے

اسے رغبت نہ ہوتی تھی

اور ان سے بحث کرنے کی

کبھی ہمت نہ ہوتی تھی

علی محسن کے تینوں یار عمر، پرکاش اور صفدرؔ

بڑے ہی بد عقیدہ تھے

وہ چاروں ساتھ جب پرکاش کے اس فلیٹ میں ہوتے

کلفٹن میں جہاں وہ شیام، رابرٹ اور نظر کے ساتھ رہتا تھا

بڑے ہی کیف میں ہوتے

وہ سارے مل کے جب پھر بیچ بروری کی چنیدہ لیموں والی ووڈکا

کے جام بھرتے تھے

تو اپنی شام کو خوش گپیوں بد فعلیوں کے نام کرتے تھے

عمر، پرکاش ،صفدر اور علی محسن کا دفتر ایک ہی تھا

اس لیے وہ پیتے پیتے مائرہ کو یاد کرتے تھے

کئی سالوں سے وہ بھی ساتھ تھی ان کے

وہ ہفتے بھر میں ہر دن اک نئی خوشبو لگاتی تھی

بڑے دانتوں جھکے کاندھوں کی لڑکی

جس کی سب باتیں نرالی تھیں

اور آنکھیں کتنی کالی تھیں

علی محسن کی آنکھیں تو نہیں باتیں نہایت خوب صورت تھیں

وہ یاروں کو بتاتا تھا

کہ وہ دفتر میں آئی سب نئی انٹرنز کے چکر میں رہتا ہے

جو تھوڑے دن کو آتی تھیں

قمیصیں جن کی اونچی تھیں

یا جن کے چاک نیچے تھے

جو بچھوے اور پازیبیں پہنتی تھیں

جو خوش ہوں یا نہ ہوں

خوش حال لگتی تھیں

وہ باتوں کی انی سے جب کسی انٹرن کے دل میں

بہت سے نت نئے اور پر مسرت خواب بوتا تھا

اسے خود بھی ذرا دھیما سا اور مغلوب سا اک عشق ہوتا تھا

وہ اپنے کام میں بھی مستعد تھا

کمپنی نے اس کو گاڑی دی تھی جس میں ڈیک لگا تھا

اور کسی انٹرن کو لے کر وہ اس پر گھومتا رہتا

پٹھانے خان کو سنتا مسلسل جھومتا رہتا

علی محسن پولیس کے روکنے کے وقت سے پہلے

کڑاہی کھا کے اور یاروں سے رخصت لے کے اپنے گھر پہنچتا تھا

پہنچتے ہی وہ ٹی وی پر کسی چینل سے آتی

انڈین پکچر لگاتا تھا

مگر پھر بھول کر سب

مائرہ کی خوشبوؤں میں ڈوب جاتا تھا