Omission, Urdu Nazam By Hassan Alvi

کسی دراز میں پڑی ہوں گی

میری آنکھوں سے لپٹی روغنی پتلیاں

جن پہ بہتان ہے

حبس رسیدہ کمرے کی سسکیاں کاٹ کھانے کا

تنومند خاتون کی ترسیب زدہ رانوں کے بیچ

تصادم کے حلقے میں پڑا

زرد سیلن کے خول میں رخنے بنتا

شہر معدوم کا لاشہ نوچتے خدا کو گھورتا ہوا میں

خدا جو سرخ دوشیزہ کے بدن پر کندہ بوسہ گاہوں کے مانند مقدس

سیاہ مست ملاح کی عورت میرے سینے پہ سر رکھتے ہوئے چنگھاڑتی ہے

وہ جہاز کے مستول سے کود کر مرا تھا

جنگ کے دنوں میں پرتگالی حسینہ سے ملاقات

وہ یقیناً مجھے مبتلا کر سکتی تھی

مگر

ہم جزیروں سے خالی ہاتھ لوٹنے والے قسم کھاتے ہیں

ہمارے پاس مشکیزوں میں سستے گڑ کی شراب ہے

اور کچھ دوست جو وافر مقدار میں تمباکو اگا رہے ہیں

سرطانی رطوبتوں میں لتھڑے

ہمارے ٹخنے بارود سے زخمی ہیں

ہم اپنے بازوؤں سے جھڑتے ہوئے بال تمہیں دکھا سکتے ہیں

نم خوردہ بندوقوں اور ناکارہ جیپوں کے علاوہ

ہمارے قبضے میں چند لڑکیاں اور رسد خانے ہیں

دھجیاں اور چیتھڑے سمیٹنے کو نحیف انگلیاں زیادہ نہیں ہیں

نچلی دراز سے میری بہتان زدہ آنکھیں نکال لاؤ

میرے بچے

کاش تمہیں جوانی میں موت آ جاتی