Koi To Aa Kar Dukhon Ko Bante Koi To Is Dil Ka Haal Jane, Urdu Ghazal By Hassan Mehmood

کوئی تو آ کر دکھوں کو بانٹے کوئی تو اس دل کا حال جانے

اگر ہیں زندہ بُلا کے لاؤ وہ دوست لَنگوٹیے پرانے

کوئی مدد کو نہ آئے گا جب تلک حفاظت نہ خود کرو گے

جنہوں نے اس گھر کی چھت گرائی اب آئے دیوار و در گرانے

تمام جیون بِتا ہے آنکھوں میں اور کیا جینا چاہتے ہو

بھلا ہو اس موت کا بالآخر جو آئی ہے اب تمہیں سلانے

گلے جو ملتے ہیں اپنے پیارے تو مِٹ ہی جاتے ہیں رنج سارے

چلو کم ازکم یہ عید آ جاتی ہے سبھی دوریاں مٹانے

نیا اک عُنواں نئی عِبارت نئے شِکنجوں کو پھر سجا کے

جو خود تھے رسوائیوں کا باعث وہ آئے ہیں عزتیں بچانے

ِوہ کر کے تکذیب کھا کے ٹھوکر یہ صدقِ دل سے سمجھ گئے ہیں

کہ اُن کی ہر بات حق تھی بالکل لکیر پتھر پہ سولہ آنے

کبھی جو فرصت ملے تو فہرستِ دشمناں کو ضرور پڑھنا

ہیں کس کی تھالی کے چَٹّے بَٹّے کہاں سے ملتے ہیں تانے بانے

طویل مدت کے بعد دیکھو یہ سرسری سا ہوا ہے ملنا

دوبارہ آئیں گے کب ملیں گے کسے خبر ہے خدا ہی جانے

نہاں بھی تو ہے عیاں بھی تو ہے جہاں میں تو ہے جہاں بھی تو ہے

میں کیسے عرفان پا سکوں گا یہ میرا معصوم دل نہ جانے

حسن وہ آئے تھے خامشی سے ملے بنا ہی چلے گئے ہیں

ہے گرچہ یہ بات سچی لیکن نہ جانے کیوں میرا دل نہ مانے