Naya Saal, Urdu Nazam By Hidayat Sayer

چلو بدلیں ، ہم اپنے حال کو اس سال

جو ماضی تھا اسے اب یاد کیا کرنا

چلو سوچیں

چلو بدلیں ، ہم اپنے حال کو اس سال

ذرا سوچو، ذرا سمجھو!

ہمارے حال کی جھپکی سے لپٹا ہے

نیا اور ایک روشن کل

وہ کل جس کے گلی کوچوں میں ڈھیروں فاختائیں ہیں

وہ روشن کل

کہ جس کے سارے شہروں میں براتیں روشنی کی ہیں

جہاں ظلم و ستم ہے اور نہ بارود کی بو ہے

جہاں ”میں تو“ کے جھگڑو ں سے کہیں آگے سبھی ”ہم “ہیں

جہاں ادھڑی ہوئی لاشیں ، نہ گولی اور نہ بم ہیں

جہاں ”میں تو“ کے جھگڑو ں سے کہیں آگے سبھی ”ہم “ہیں

ذرا سوچو، ذرا سمجھو!

جو ماضی تھا، وہ ماضی ہے

سو ماضی پیٹنے سے ہم کو حاصل کچھ نہیں ہونا

گزشتہ کے تصور میں ، ہم آئندہ کو بھولیں گے

تو حاصل کچھ نہیں ہو گا

چلو سوچیں، چلو بدلیں ۔۔۔ہم اپنے حال کو اس سال