Aatishdan Main Kamra, Urdu Nazam By Hidayat Sayer

وہی کمرہ، وہی چائے، وہی سگریٹ، وہی میں ہوں

مری کھڑکی سے باہر بھی

سبھی منظر وہی تو ہیں

وہ برفیلے دسمبر کی ٹھٹھرتی سرحدوں سے دور

وہ ماہِ جنوری کی سرد شاموں تک وہی کچھ ہے

وہی احساس کے ناخن سے کھرچے زخم بھی اورمیری مرضی کا

قیامت خیز موسم بھی

وہی کمرے کا اک کونا

اکیلا میں ، اک آتش دان

وہیں پر ڈائری کے پاس رکھے کچھ ترے تحفے

اس آتش دان کے اندر

دہکتے کوئلوں کا ڈھیر

اور اس ڈھیر سے اٹھتا دھواں ، شعلے

لزرتے ہاتھ،اشکوں سے بھری آنکھیں

دہکتے کوئلوں کے ڈھیر پر جلتی ہوئی وہ ڈائری اور ساتھ جلتی کچھ تری یادیں

وہی میں ہوں ،وہی ہے ہاتھ میں بجھتی ہوئی سگریٹ

مگر چوکورسا کمرہ "تکونی" ہو گیاہے اب

محبت نام کا جذبہ جنونی ہو گیاہے اب