Cheeta, Urdu Nazam By Iftikhar Bukhari

چیتا تھا وہ

رات کی طرح سیاہ

اور

پراسرار

کائنات میں تنہا

موت سے بے خبر

کیچڑ میں لتھڑا

بِن ماں کا معصوم

وہ بھوکا تھا

وہ مشکل سے رینگتا

وہ پیاسا تھا

زخموں کا لہو چاٹتا

وہ گِرا ہوا جنگجو تھا

بازی پلٹنے کے انتظار میں

کوسے پانی اور محبت نے

اُسے اور بھی چمکدار بنا دیا

وقت نے اُس کے قدموں میں وقار

زاویوں میں متانت

اور آنکھوں میں غضب بھر دیا

وہ دور دراز کی ویرانیوں کی کھوج میں نکلا

اُس نے اجنبی زمینوں پر تسلط کیا

وہ خوف سے ناواقف تھا

وہ نڈر تھا

وہ چھلاوا تھا

رازوں بھری راتوں میں

اوجھل ہونے کا ماہر

وہ تیز ہوائوں پر حملہ کرتا

برف پوش ٹیلوں میں آگ تھا وہ

پر وہ اداس ہو جاتا

اور لوٹ آتا

میرے اداس ہونے سے پہلے

جیسے وہ میری روح تھا

کوئی آندھی

کوئی بارش

کوئی برف باری اُسے روک نہ پاتی

اِسی لیے

مجھے اب بھی دکھائی دیتی ہیں

بہت دور

کہیں غبارِ عدم میں جلتی

اُس کی سبز آنکھیں