Santa Claus, Urdu Nazam By Iftikhar Bukhari

آج سہانا کرسمس ہے

گرجے کے سبزہ زار میں

میٹھی دھوپ ہے

اُڑتے رنگوں جیسے بچّے

فادر کی سنگت میں گاتے ہیں

" آج سہانا کرسمس ہے "

اِک معصوم سا بچّہ

جِس کے دُھلے ہوئے کپڑوں میں

اُس کے باپ کی مفلسی

چھپ نہیں پاتی،

فادر سے کہتا ہے،

" فادر! تم نے سانتا کلاز کو دیکھا ہے؟"

" اوہ! وہ برفیلا بابا

اُجلی اُجلی، پُھولی پُھولی داڑھی والا

آدھی رات کو

سب سے چھپ کر آتا ہے

بچوں کے لیے میٹھی ٹافیاں

اور کھلونے

کرسمس ٹری پہ ٹانک کے

واپس دور کہیں کھو جاتا ہے

اپنی شمالی برفوں میں"

بچّہ فادر سے کہتا ہے،

" بڑے بڑے لوگوں کے گھر تو

مہنگے مہنگے اور بہت سے

ٹافیوں والے ڈبّے

اور کھلونے دے کر جاتا ہے اور میرے لئے

یہ چار آنے کا

کانچ کا چھوٹا سا ہاتھی!

پچھلے سال تو سانتا کلاز

ہمارے گھر آیا ہی نہیں تھا

فادر! وہ ایسا کیوں کرتا ہے"

فادر جی کی دانش

کوئی ایسا فقرہ بن نہیں پاتی

جو بچّے کے بھولے پن کو دھوکا دے

وہ کہتے ہیں،

" بس بچّے وہ ایسا ہی ہے"

بچّہ سوچتے سوچتے

چلنے لگتا ہے

پھر مُڑ کر کہتا ہے،

" برفیلا بابا گندا ہے"