Yeh Kya Kaha Mujhe O Bad Zuba Bohat Acha, Urdu Ghazal By Imdad Ali Bahr

یہ کیا کہا مجھے او بد زباں بہت اچھا

سنا لی اور بھی دو گالیاں بہت اچھا

تمہیں تو اور بھی اشخاص پیار کرتے ہیں

ہمیں یہ جور و جفا مہرباں بہت اچھا

کسی پہ یوں نہیں پڑتی نگاہ خون آشام

ہمیں ہیں تیر ستم کے نشاں بہت اچھا

نہ ہو دو چار نہ بولو نہ اختلاط کرو

بہت بجا بہت انسب میاں بہت اچھا

جو میں برا تو برا اور سب تو اچھے ہیں

ملو جہاں سے جان جہاں بہت اچھا

برا بھلا ہمیں کہنے سے فائدہ کیا ہے

چمن سے جاتے ہیں اے باغباں بہت اچھا

ہمارے رہنے سے تجھ کو جو آگ لگتی ہے

جلائے دیتے ہیں ہم آشیاں بہت اچھا

کبھی جو روتے ہیں جھنجھلا کے یار کہتا ہے

میں سن رہا ہوں کرو تم فغاں بہت اچھا

خفا نہ ہو نہ کروں گا بکا بہت بہتر

نہ ہوں گے اب کبھی آنسو رواں بہت اچھا

جو زندگی ہے تو جیتا رہوں گا فرقت میں

صد ہاریے مری آرام جاں بہت اچھا

نثار لا کہ سر ایسے تمہاری قدموں پر

کریں گے آپ مرا امتحاں بہت اچھا

خدا نے نور کے سانچے میں تجھ کو ڈھالا ہے

ہزار میں ہے تو اے نوجواں بہت اچھا

مرے نگاہ میں تو حور سے کہیں بہتر ہے

مقام خلد سے تیرا مکان بہت اچھا

بہت پسند ہے مجھ کو یہ بول چال اے بحرؔ

قسم خدا کی یہ طرز بیاں بہت اچھا