Hawa Aur Suraj Ka Muqabla, Urdu Nazam By Ismail Merathi

ek musafir apni dhun mein tha rawan
us ko in donon ne taka na-gahan
ho gae aapas mein tai qaul-o-qarar
jo labaada le musafir ka utar
bas usi ke nam ka Danka baje
sar pe dastar-e-fazilat wo saje
phir to aandhi ban ke chal nikli hawa
aisi biphri kar diya tufan bapa
unche unche peD tharrane lage
jhok se jhokon ki charrane lage
naunihaalon ki kamar bal kha gai
phul patton par qayamat aa gai
kanp uThe us dasht ke kul wahsh o tair
mangte the apne apne dam ki KHair
ho gaya daman-e-sahra gard-bard
ghir gaya aafat mein wo sahra-naward
chahti thi lun libaade ko uchak
muddai ko dun sar-e-maidan zak
jab hawa leti thi chakkar mein lapeT
baiTh jata tha wo daman ko sameT
sina-zori se na chori se Dari
kar saki lekin na kuchh ghaarat-gari
bandh li kas kar musafir ne kamar
ta hawa ka ho na kapDon mein guzar
thak gai aaKHir na us ka bas chala
Tal gai sar se musafir ke bala
ab thama jhakkaD to nikla aaftab
ru-e-nurani se sarkai naqab
tamkanat chehre se us ke aashkar
chaal mein ek burd-bari aur waqar
wo hawa ki si na thi yan dhum-dham
kar raha tha chupke chupke apna kaam
dhimi dhimi kirnen chamkane laga
rafta rafta sab ko garmane laga
us musafir ko pasina aa gaya
khol Dale band ji ghabra gaya
aur aage ko baDha to dhup se
tan-badan mein kuchh patange se lage
ab libaade ko liya kandhe pe Dal
badli yun naubat ba naubat chaal-Dhaal
jab chaDha KHurshid samt-u-rras par
baiTh kar sae mein phir to ghas par
dur phenka us libaade ko utar
wah-re suraj liya maidan mar
tezi-o-tundi ke girwida hain sab
kaamyabi ka magar hai aur Dhab
us ka gur hai narmi o aahistagi
sar-kashi ki rag usi se hai dabi