Karachi Wale, Urdu Ghazal By Jabbar Wasif

ساحلوں جیسے طَرَحدار کراچی والے

خُوش رہیں سارے مرے یار کراچی والے

شعر کیا چیز ہے، تخلیق کسے کہتے ہیں؟

جا کے سُن لیجئے اشعار کراچی والے

میرؔ و غالبؔ سے جو تہذیب روایت ہے ہمیں

اُس تَمَدُّن کے ہیں آثار کراچی والے

یُوں تو سب لوگ ہیں سُورج کے طرَف دار مگر

فِکر کو کرتے ہیں بیدار کراچی والے

کتنے خوش بخت ہیں پنجاب کے سب اہلِ ہُنر

اِن سے کرتے ہیں بہت پیار کراچی والے

ہو بھلا اہلِ سیاست کا، کہ جن کے دم سے

ہیں لہُو رنگ یہ اخبار کراچی والے

کیسے ہوتی ہے بسر، پُوچھا، تو خاموش رہے

سہمے سہمے ہوئے اشجار کراچی والے

زندگی تجھ سے تعلق کو نبھانے کے لیے

جھیلتے ہیں کئی آزار کراچی والے

اہلِ زر کے ہیں جُدا اور غریبوں کے جُدا

کیا کہوں کیسے ہیں بازار کراچی والے

اپنے پندار کی قیمت کا ہے اندازہ اِنہیں

بادشاہوں سے ہیں بیزار کراچی والے

پا بہ زنجیر ہوائیں ہیں، فضا قید میں ہے

بَخُدا پھر بھی ہیں اَحرار کراچی والے

آپ سے دادِ شجاعت بھی نہیں مانگتے ہیں

جبر سے بر سرِ پیکار کراچی والے

بھید جتنے ہیں سمُندر کے وہ سب جانتے ہیں

پھر بھی کرتے نہیں اِظہار کراچی والے

سرِِ دیوار تو ہم کو بھی نظر آتا ہے

دیکھتے ہیں پسِ دیوار کراچی والے

زَعم ہے اِس لیے قامت کی بلندی کا تجھے

تُو نے دیکھے نہیں کُہسار کراچی والے

شام ڈھلتے کوئی چوپال سجاتے ہم بھی

کاش ہوتے یہاں دو چار کراچی والے

ہم مسافر ہیں کسی دشتِ سُخن کے واصفؔ

اور ہیں قافلہ سالار کراچی والے