Wohi Musafir Msafarat Ka Mujhe Qarina Sikha Raha Tha, Urdu Ghazal By Jabbar Wasif

وہی مسافر مسافرت کا مجھے قرینہ سکھا رہا تھا

جو اپنی چھاگل سے اپنے گھوڑے کو آپ پانی پِلا رہا تھا

دُکھوں کے گارے میں ہاتھ لتھڑے ہوٸے تھے میرے ہُنَر کے لیکن

میں روتے روتے بھی مُسکراتا ہوا کوٸی بُت بنا رہا تھا

سُنا ہے کل رات مر گیا وہ بَرَہنَہ درویش جھونپڑی میں

فنا کے بستر پہ جو بقا کی حَرِیص گُدڑی بِچھا رہا تھا

مری نظر میں وہ طِفل مسجد کے پیشوا سے بھی محترم ہے

جو احتراماً گلی سے گندم کے بِکھرے دانے اُٹھا رہا تھا

بہت مُقَدّس تھے اُس سِپاہی کی دونوں آنکھوں کے سُرخ ڈورے

جو سوٸی مَخلُوق کی حِفاظت میں خواب اپنے گنوا رہا تھا

تمام شب اُس کے بھوکے بچّوں نے جاگ کر ہی گزار دی تھی

خُودی کے فُٹ پاتھ پر جو غُربَت تھپک تھپک کر سُلا رہا تھا

وہ میری برسی پہ میری میَّت کے نام شام ِ غزل تھی واصِف

میں اپنی تُربَت میں لیٹے لیٹے کلام سب کو سُنا رہا تھا