Bhare Ghar Mein Hai Mera Aashna Kon, Urdu Ghazal By Jamal Ehsani

بھرے گھر میں ہے میرا آشنا کون

بھلا مجھ سا ہے کوئی بے گھرا کون

اگر میں ہوں تو پھر تکرار کیسی

مِرے اندر ہے آخر دوسرا کون

سمندر کے اُدھر آنکھیں لگی ہیں

یہ ڈھیروں پانی آخر پی گیا کون

ندی کی لہریں اپنی مَوج میں ہیں

کنارے پر ہے یہ بیٹھا ہُوا کون

اکیلی شاخ کا دُکھ معتبر تھا

مگر پت جھڑ میں جُھولا جُھولتا کون

جب اُس کو جیتنا بھی ہار ٹھہرے

تو کھیلے زندگی بَھر کا جُوا کون

گزرتی رات نے چُپ سادھ لی ہے

نہ جانے آتے آتے رُک گیا کون

سو ہم دونوں ہوئے ہیں ریزہ ریزہ

اِسی خواہش میں پہلے ٹُوٹتا کون

وصال و ہجر سے تھا ماورا عشق

مگر اِس زاویے سے دیکھتا کون

مُنڈیروں پر اُتر آئے پرندے

یہ دروازے پہ دستک دے گیا کون

ہوئی تھی برف باری جس کی چھت پر

کل اُس کمرے میں جل کے مر گیا کون

مری مٹھی میں جس کی خاک ہے بند

بھلا اُن بستیوں تک جا سکا کون

اُن آنکھوں میں چُھپے خوابیدہ جگنو

اندھیری رات میں روشن رہا کون

تنِ تنہا تھا اور لمبی سڑک تھی

مرے ہمراہ‘ پر چلتا رہا کون