Aik Na Makhtam Kahani, Urdu Nazam By Jameel Ur Rahman

نہیں ختم ہوتی یہ کہانی

نجانے کب سے اس کے کردار زندہ ہیں

اور ہوا اُسی طرح

اپنے شانے جھکائے چل رہی ہے

جزیرے نے

سمندر کی کھال ادھیڑ کر

اُس میں اپنی جگہ بنائی

لیکن مچھلی نے

اُسے اپنے جبڑوں میں دبوچ لیا

ستاروں کا جال

سمندر،جزیرے اور مچھلی سے بڑا تھا

آسمان نے اُسے اُن پر پھینک دیا

آبی چوہوں کو جال کترتا دیکھ کر

ہوا اُسے دانتوں سے پکڑ کر

اپنے کاندھوں پر جھلاتے ہوئے

جن بستیوں میں لے جاتی ہے

وہ سنہری اور فربہ ہیں

بیمار اور صحت مند وقت کی

ہیجانی مباشرت کی لذّت سے آشنا

اور کام ودہن کو شاد کرنے کے لیے

اپنی کوکھ میں پلتے نطفوں کے

جنم لینے کے انتظار میں رقص زن

بے نیاز و بے طلب

ہوا کیا کرے

وہ سمندر کہاں بہائے

جزیرہ کہاں رکھے

اور مچھلی کسے دے؟

آنکھیں جھوٹ نہیں بولتیں

وہ گنگ ہیں مگر دیکھ سکتی ہیں

کہ ہوا آسمان سے ناراض ہے

لیکن سنہری فربہ بستیوں کی

اُن گلیوں میں چنگھاڑتی ہے

جن میں مانجھی اور مچھیرے

فاقہ کش بادبان

اورادھڑے ہوئے جال اٹھائے

گریہ کرتے ہیں

کہ ہوا اُن کی ایک نہیں سنتی

میں دیکھتا ہوں

تم دیکھتے ہو

ہم سنتے ہیں

سبھی کچھ

مگر آگے بڑھ جاتے ہیں

اور

کہانی ختم نہیں ہوتی