Goonge Dumbs, Urdu Nazam By Jameel Ur Rahman

درختوں سے جھڑتے ہوئے زرد پتے

ہوا کے جلو میں

لپکتی ہوئی برف کے سرد گالے

سمندر کو چھو کر نکلتے ہوئے چاند کی رہگزر میں

دھندلکوں میں ڈوبی ہوئی آنکھ کے سب حوالے

منافق زبانوں کی دہلیز پر

سر سر ا تے ہوئے لفظ پر خندہ زن ہیں !

یہاں قاتلوں کی ہتھیلی پہ بہتے لہو کا

نشاں تک نہیں ہے

کسی کو گماں تک نہیں ہے

کہ کس نے یہاں

عدل و انسانیت کے علم

بے کسوں کے دلوں کی رگیں نوچ کر

ریشہ ہائے انا سے بنے ہیں

لڑکپن میں مجنوں پہ پتھر اٹھاتی ہوئی بے حسی نے

بریدہ سروں کے جو مینار اب تک چنے ہیں

وہ کیا ہیں؟

وہ کیوں ہیں؟؟

جنہیں یہ خبر ہے

وہ ایوان ِ بالا میں

زرتار اور مخملیں مسندوں پر

مفادات کے گاؤ تکیے لگائے

نفاست سے قہوہ بھری پیالیاں

سامنے رکھے

انجام سے بے خبر

اپنے شہوت سے معمور سپنوں میں

کھوئے ہوئے ہیں!

جنہیں اعتبار ِنظر ہے

وہ بزدل شرافت کے پہلو میں

بےحس ضمیروں کے خیمے لگائے

خموشی کی چادر میں چہرے چھپائے

لہو رو رہے ہیں !!!!!!!!!